“पर्यावरणपूरक इलेक्ट्रिक वाहने ही सध्याच्या काळाची गरज असून, बृहन्मुंबई महानगरपालिका क्षेत्रातील वेगवेगळ्या सार्वजनिक वाहनतळांवर इलेक्ट्रिक वाहनांकरिता चार्जिंगची सुविधा उपलब्ध करून द्यावी, या अनुषंगाने इलेक्ट्रिक वाहनांची संख्या जास्त असलेल्या परिसरांत इलेक्ट्रिक वाहने चार्जिंग स्टेशन चालू करण्याचा प्राधान्यक्रम निश्चित करणे आवश्यक आहे. यादृष्टीने अभ्यासपूर्ण सर्वेक्षण करूनच जास्तीत जास्त सार्वजनिक वाहनतळांच्या ठिकाणी चार्जिंग स्टेशनची सुविधा उपलब्ध करून द्यावी”, असे निर्देश राज्याचे पर्यावरण मंत्री आणि मुंबई उपनगर जिल्ह्याचे पालक मंत्री आदित्य ठाकरे यांनी बृहन्मुंबई महानगरपालिका प्रशासनाला दिले आहेत. आज दादरमधील मनपा सार्वजनिक वाहनतळामध्ये उभारण्यात आलेल्या इलेक्ट्रिक वाहन चार्जिंग स्टेशनचे लोकार्पण करताना ते बोलत होते. विशेष म्हणजे आज लोकार्पित करण्यात आलेले चार्जिंग स्टेशन हे सार्वजनिक वाहनतळांमध्ये कार्यान्वित करण्यात आलेले राज्यातील पहिले “इलेक्ट्रिक वाहन चार्जिंग स्टेशन’ आहे.
चार्जिंग स्टेशनच्या ठिकाणी पार्किंग व चार्जिंगची सुविधा एकाच भागात उपलब्ध
दादरमधील प्लाझा चित्रपटगृहाजवळील आणि बृहन्मुंबई महानगरपालिकेच्या जी उत्तर विभाग कार्यालयाजवळ असणाऱ्या मनपा सार्वजनिक वाहनतळामधील दुसऱ्या मजल्यावर इलेक्ट्रिक वाहन चार्जिंग स्टेशनची सुविधा आजपासून कार्यान्वित करण्यात आली आहे. या लोकार्पण कार्यक्रमासाठी आमदार सदा सरवणकर, आमदार मनीषा कायंदे, स्थानिक नगरसेविका प्रीती पाटणकर, माजी महापौर आणि नगरसेविका श्रद्धा जाधव, जी उत्तर विभागाचे सहाय्यक आयुक्त किरण दिघावकर यांच्यासह मोठ्या संख्येने मान्यवर नागरिक उपस्थित होते. आज लोकार्पित करण्यात आलेल्या चार्जिंग स्टेशनच्या ठिकाणी पार्किंग व चार्जिंगची सुविधा एकाच भागात उपलब्ध करून देण्यात आली आहे. या सुविधेमुळे परिसरातील नागरिकांना आणखी एक वैशिष्ट्यपूर्ण सुविधा उपलब्ध होण्यासह इलेक्ट्रिक वाहनांच्या माध्यमातून प्रवास करून मुंबई शहरामध्ये येणाऱ्या नागरिकांनाही एक महत्त्वाची सुविधा उपलब्ध झाली आहे.
चार्जिंग स्टेशन आठवड्याचे ७ दिवस २४ तास नागरिकांच्या सुविधेकरिता
पार्किंग व चार्जिंग एकाच ठिकाणी उपलब्ध असणाऱ्या या चार्जिंग स्टेशनमध्ये एकाच वेळी सात इलेक्ट्रिक वाहनांचे चार्जिंग करण्याची सुविधा उपलब्ध करून देण्यात आली आहे. यापैकी चार ‘चार्जर’ हे जलद चार्जर आहेत. या प्रत्येक चार्जरच्या माध्यमातून साधारणपणे एका तासात १ वाहन, यानुसार एका तासामध्ये एकावेळी तब्बल चार वाहने ‘चार्ज’ करता येणार आहेत. याशिवाय तीन चार्जर हे स्लो चार्जर या प्रकारामधील आहेत. याद्वारे एक वाहन फुल्ल चार्ज करण्यासाठी साधारणपणे सहा तासांचा कालावधी लागणार आहे. या भागात इलेक्ट्रिक वाहन चार्ज करण्याकरिता प्रतियुनिट रुपये १५/- एवढी फी आकारण्यात येणार आहे. विशेष म्हणजे हे चार्जिंग स्टेशन आठवड्याचे ७ दिवस २४ तास नागरिकांच्या सुविधेकरिता उपलब्ध राहणार आहेत, अशी माहितीही यानिमित्ताने सहाय्यक आयुक्त किरण दिघावकर यांनी दिली आहे.
