डोंबिवली पूर्वेला रेल्वे स्थानक परिसरामधील रामनगर व पाटकर रस्त्यावर सकाळच्या वेळी वाहतूककोंडीला सामोरे जावे लागत आहे. त्यामुळे लोकल गाठण्याकरिता घाईत असणारे नोकरदार मेटाकुटीला आले आहेत. रामनगरमध्ये वाहतूक नियंत्रण कक्षासमोरच बेशिस्त रिक्षाचालक रिक्षा कशाही उभ्या करतात. त्यामधून नोकरदार आपली दुचाकी घेऊन थेट स्थानकापर्यंत जाण्याचा प्रयत्न करत असल्यामुळे वाहतूककोंडीत भर पडते. त्यामुळे सकाळच्या वेळी वाहतूक पोलीस नेमून या रिक्षाचालकांना चाप लावावा, अशी मागणी नोकरदारांमार्फत होत आहे.
वाहतूककोंडीमध्ये आणखी भर
रेल्वे स्थानकाबाहेर रामनगर व पाटकर रस्त्यावर रिक्षा स्टॅण्ड आहे. सकाळी शहरामधील वेगवेगळ्या भागांतून नोकरदार रिक्षाने रेल्वे स्थानक गाठतात, तर काही जण दुचाकी, चारचाकींनी येथे येतात. रामनगरमध्ये वाहतूक पोलीस नियंत्रण कक्षादेखतच रिक्षाचालक आडव्या-तिडव्या रिक्षा उभ्या करतात. प्रत्येकाला घाई असल्यामुळे कोणी थांबायला तयार नसतो. त्यामुळे कोंडीमध्ये आणखी भर पडते. त्यावर एकूणच वाहतूक नियंत्रण शाखेचे वचक नाही, अशी थेट टीका नोकरदारांनी केली आहे.
रिक्षांच्या लांबच लांब रांगा
स्वामी विवेकानंद रस्त्यापासून केळकर रस्त्यापर्यंत मंगळवारी सकाळी रिक्षांच्या लांबच लांब रांगा लागल्या होत्या. स्थानकापर्यंत आलेल्या रिक्षांना माघारी फिरण्याकरिता यु टर्न घेणे अवघड झाले होते. त्यामध्ये काहींनी वाहतूककोंडी टाळण्याकरिता केळकर रस्त्यावर यु टर्न घेण्याचा प्रयत्न केला, परंतु दुतर्फा वाहने असल्याने तो प्रयत्न फसला. त्यामुळे रस्ता आणखी जाम झाला. त्यामुळे लोकल पकडण्याकरिता घाईत असलेल्या नोकरदारांना स्थानक गाठताना नाकीनऊ आले. बरेच जण केळकर रस्त्यावर रिक्षामधून उतरून उर्सेकर वाडीतून स्थानकात गेले, परंतु यात वेळ वाया गेला, तर काहींची लोकल चुकल्याने त्यांनी तीव्र नाराजी व्यक्त केली.
वाहतुकीच्या नियोजनाअभावी समस्या निर्माण
सकाळच्या वेळेत रामनगर, पाटकर आदी ठिकाणी वाहतूककोंडी होऊ नये, याकरिता पोलीस कर्मचारी नेमला जातो, परंतु मंगळवारी दोघे जण आजारी पडले. त्यामुळे वाहतुकीच्या नियोजनाअभावी समस्या निर्माण झाली. राथ रोडवर नोकरदार, प्रवाशांची होणारी गैरसोय लक्षात येताच ती सोडवण्यात आली. त्यासाठी आता वाहतूककोंडी सोडवण्यावर जास्त भर दिला जात आहे.
Credits and. Copyrights – May Marathi
