जगभरात गेल्या दीड वर्षापासून कोरोनाने हाहाकार माजवला आहे. दुसऱ्या लाटेत आपण जवळचे लोकदेखील गमावले आहेत. यंदाच्या गणेशोत्सवामध्ये ऑनलाईनवर भर देत आणि सामाजिक उपक्रम राबवत गणेशोत्सव साजरा केला जाणार आहे, अशी भूमिका मंडळांनी घेतली असून, पुणे महानगरपालिकेमध्ये गणेशोत्सव पूर्वतयारी २०२१ करिता मंडळांच्या बैठकीचे आयोजन करण्यात आले होते. यावेळी मंडळांच्या अध्यक्षांनी आपली मते मांडली आहेत. दीड वर्षामध्ये सगळ्याच गोष्टींवर बंधने आली आहेत. कोरोनासंदर्भात जनजागृती करणे आवश्यक आहे. त्याकरिता मंडळांना झिरो बजेट कार्यक्रम द्यावेत. तिसऱ्या लाटेवर मात करण्याकरिता लसीकरण, कोरोना नियम यासंदर्भात समाजप्रबोधन कार्यक्रमाची मुभा द्यावी, असेही ते म्हणाले आहेत. गणेशोत्सव ३० दिवसांवर येऊन ठेपला आहे. वैभवशाली उत्सवावर कोरोनामुळे सावट अद्यापही आहे. त्याच पार्श्वभूमीवर मंडळांची बैठक घेण्यात आली होती. गणेशमूर्ती विसर्जनावर या बैठकीमध्ये महत्त्वाची भूमिका मांडली. कार्यकर्ते म्हणाले, महापालिकेने मूर्तीदान या उपक्रमाचा विचार करावा. त्यांचे स्टोरेज करण्याची तयारी करावी, तसेच लोकांच्या भावना दुखावल्या जाणार नाहीत याकडे देखील लक्ष द्यावे. शहरामधून साडेचार लाख मूर्ती विसर्जन होत असतात. त्यासाठी ठोस उपाययोजना कराव्यात.
गर्दी टाळण्याचा प्रयत्न
गणेशोत्सव साधेपणाने साजरा होणार असून, असंख्य कार्यक्रम, शिबिरे ही जर ऑनलाईनच्या माध्यमामधून राबवली. तसेच गर्दी टाळण्याचा प्रयत्न केला. तरीही युट्यूब, फेसबुकवर हे कार्यक्रम वर्षानुवर्षे राहतात. त्यानुसार या कार्यक्रमांवर भर द्यावा
पोलिसांमार्फत नियम अजून कडक केले
शहरामध्ये जास्तीत जास्त निर्बंध असतात. उपनगरामध्ये त्या तुलनेत निर्बंध वाढवण्याची आवश्यकता लागत नाही. प्रशासन नियम वेगळे सांगते. पोलिसांमार्फत नियम अजून कडक केले जातात. दोघांच्यात तफावत नसावी. कोरोनाच्या पार्श्वभूमीवर भजन, कीर्तन, समाजप्रबोधनात्मक कार्यक्रमाला मुभा मिळाली आहे. त्याकरिता नियमावली जाहीर करावी.
मंडळांना उत्सवात कोणतीही अडचण येणार नाही
”पुण्यामधील गणेशोत्सव मंडळानी घेतलेल्या निर्णयाचे महापालिका स्वागत करत आहे. मंडळांना उत्सवात कोणतीही अडचण येणार नाही. २०१९ साला जे परवाने देण्यात आले होते. तेच यंदाच्या वर्षी चालणार आहेत. कार्यकर्त्यांना पोलीस स्टेशनला येण्याची आवश्यकता लागणार नाही. तसेच मूर्ती विसर्जनाकरिता महापालिकेमार्फत योग्य नियोजन करण्यात आले आहे. कृत्रिम हौद वाढवण्यासोबत, गणेश मूर्ती विसर्जनाकरिता लागणारी पावडर मुबलक प्रमाणात मागवण्यात आली आहे. तसेच शहरामधील १५ क्षेत्रीय कार्यालयांतर्गत येणाऱ्या शाळा, मैदाने व मोकळ्या जागेत पाण्याचे हौद बांधण्यात येणार आहेत, असे महापौर मुरलीधर मोहोळ यांनी सांगितले.”
कोरोना रुग्णांची संख्या वाढत आहे
”पुणे शहरामध्ये अद्यापही कोरोना रुग्णांची संख्या वाढत आहे. दिवसाला २०० च्या आसपास रुग्ण आढळून येत आहेत. महापालिकेच्या वतीने गणेश मंडळांना सहकार्य केले जाणार आहे. मंडळांनी देखील समाजभान ठेवून उत्सव साधेपणाने साजरा करावा, असे आवाहन पुणे महानगरपालिका आयुक्त विक्रम कुमार यांनी केले आहे.”
Credits and Copyrights – May Marathi
