कोरोनामुळे अनेक व्यवसायांना फटका बसला. त्याचप्रमाणे सिनेसृष्टीलाही मोठ्या प्रमाणात तोटा सहन करावा लागला. अनेक चित्रपटांचे चित्रीकरण लॉकडाऊनमुळे अर्धवट राहीले होते. अनलॉकनंतर काही प्रमाणात ते सुरू झाले. या काळात एका आगामी मराठी चित्रपटाच्या उर्वरीत भागाच्या चित्रीकरणाचे काम चालू असताना जेष्ठ अभिनेते मिलिंद शिंदे यांच्या जीवावर बेतण्याइतकी घटना घडली.
चित्रपटाचे चित्रीकरण सुरू झाल्याने सेटवरील सर्वजण आनंदात शुटिंग करत होते. चित्रपटाच्या बजेटनुसार मोठमोठे लाईट्स, जिमी जीब क्रेन्स, मल्टिकॅमेरा सेटअप अश्या अनेक अवजड उपकरणांच्या साहाय्याने रात्रीच्या वेळी चित्रपटाच्या चित्रीकरणाचे काम सुरु होणार होते. मिलिंद शिंदे आपल्या भूमिकेमध्ये मग्न होऊन सराव करत होते. ते स्क्रिप्ट वाचण्यात इतके मग्न होते कि आजूबाजूला काय घडत आहे. याकडे त्याचं लक्ष्य नव्हतं. कॅमेरा टीमही जीबवर कमी प्रकाशातील शॉटच्या चित्रीकरणाचा सराव करत होती.
एका सीनसाठी जिमी जीब क्रेनचं वेगाने खाली येणं हा चित्रीकरणाचा महत्वपूर्ण भाग होता आणि म्हणूनचं क्रेनच्या वेगाचे नियंत्रण हे योग्य असावे यासाठी टीम काम करत होती. या आव्हानात्मक शॉटच्या सरावात टीम इतकी गुंतली होती की कोणालाचं सरावात मग्न असणारे मिलिंद शिंदे हे क्रेनच्या खाली उभे असलेले समजले नाही, आणि सरावादरम्यान वेगाने खाली येणारया क्रेनला ऑपरेटरने चपळाईने नियंत्रित करण्याचा प्रयत्न केला. नेमक्या त्याच क्षणी मिलिंद शिंदे फ्रॅक्शन ऑफ सेकंदातच खाली वाकले आणि थोडक्यात बचावले. जिमी जीब ऑपरेटरने प्रसंगावधान दाखवून ती क्रेन नियंत्रित केली म्हणून होणारा भयंकर अनर्थ टळला.
“एखाद चांगलं काम आपल्या हातून घडत असेल तर तेव्हा संकटाची सावलीदेखील आपल्यावर पडत नाही. अगदी त्याचप्रमाणे मी जरी माझ्या भूमिकेच्या तयारीत रमून गेलो होतो. रात्रीच्या समयी माझ्या आजूबाजूला चालत असलेल्या गोष्टीदेखील मला त्या क्षणासाठी दिसल्या नाहीत मग ती मोठी जिमी जीब का असेना. मी त्यावेळी जर झुकलो नसतो तर त्या लोखंडी जिमी जीबच्या माराने कदाचित मला गंभीर दुखापत झाली असती, पण सेटवरच्या सकारात्मक ऊर्जेमुळे मला खरचटलंदेखील नाही. सेटवर लोकांनी वेळीचं दाखवलेल्या प्रसंगावधामुळे माझा जीव वाचला. मी जरी माझ्या कामात रमलो असलो तरी सेट वरील प्रत्येकाने मला कोणतीही इजा होणार नाही याची काळजी घेत काम केलं याचं मला कौतुक वाटतं”, असे अभिनेते मिलिंद शिंदे यांनी प्रसंगाबद्दल यांनी सांगितले.
Credits and Copyrights – lokshahinews.com
