नागपूर : मुख्यमंत्री उद्धव ठाकरे आणि विरोधी पक्षनेते देवेंद्र फडणवीस यांच्यातील बंदद्वार भेटीवर राष्ट्रवादीच्या नेत्या खासदार सुप्रिया सुळे यांनी “माझे आयुष्य ब्रेकिंग न्यूज नाही’ अशी प्रतिक्रिया व्यक्त करीत तत्काळ प्रतिक्रिया व्यक्त करण्यास नकार दिला.
नागपूर दौऱ्यावर असलेल्या सुप्रिया सुळे म्हणाल्या की, मी इतकं इम्पलसिव्हली आयुष्य जगत नाही. कोणी काही बोलले तर मी थोडा वेळ विचार करते. माझे आयुष्य ब्रेकिंग न्यूज नसून वास्तव आहे. त्यामुळे मी इन्स्टंट कॉफी पित नाही. मात्र, ठाकरे-फडणवीस भेटीची मला माहिती नाही. सर्व पक्षाचे नेते निवडणुका सोडून आपले वैयक्तिक संबंध चांगले ठेवत असतील तर त्याचे मनापासून स्वागत करायला हवे. माझ्यावर यशवंतराव चव्हाणांचे संस्कार आहेत. त्यांचे सर्वांशी वैयक्तिक संबंध चांगले होते. राजकीय मतभेद एका ठिकाणी आणि वैयक्तिक नाती एका ठिकाणी यात काही गैर नसल्याचे सुळे यांनी सांगितले.
भाजपकडून ईडी आणि सीबीआयच्या धमक्या दिल्या जात आहेत. नारायण राणे यांनी अनिल परब यांना ईडीची धमकी दिली आहे, याकडे लक्ष वेधले असता ईडीच्या कारवाईचे मी मनापासून स्वागत करते. राष्ट्रवादीला ईडीचा नेहमीच फायदा झालाय, असा चिमटा सुप्रिया सुळेंनी काढला. ठाकरे-फडणवीस भेटीने पुन्हा एकदा युतीच्या चर्चांना उधाण आले आहे, याकडे लक्ष वेधले असता महाविकास आघाडी पाच वर्षे नाही पण 25 वर्षे या राज्याची सेवा करेल, असे त्या म्हणाल्या. काँग्रेस प्रदेशाध्यक्ष नाना पटोले यांच्या स्वबळाच्या नाऱ्यावर प्रत्येकाला पक्ष वाढीचा अधिकार असल्याचे त्यांनी सांगितले
This News post has been retrieved from RSS feed, We do not claim its copyrights or credits. If you wish have credits contact us.
