कळवा हॉस्पिटलमधील प्रकार
ठाणे : कोरोनाची दुसरी लाट ओसरत असतानाच ठाण्यात डेंग्यू, मलेरीया, चिकनगुनिया या आजारांनी डोके वर काढले आहे. विशेष म्हणजे चिकनगुनियाच्या उपचारासाठी कळव्यातील छत्रपती शिवाजी महाराज रुग्णालयात दाखल करण्यात आलेल्या महिलेला या आजारावरील इंजेक्शनच मिळत नसल्याची धक्कादायक बाब सत्ताधारी शिवसेनेच्या नगरसेवकांनी उघड केली.
बुधवारी झालेल्या महासभेत शिवसेनेच्या नगरसेविका मिनल संख्ये यांनी शहरात डेंग्यु आणि इतर आजारांचे रुग्ण किती आहेत याची माहिती आरोग्य विभागाला विचारली. तर रघुनाथ नगर भागात एका महिलेला चिकनगुनियाची लागण झाली असून तिला उपचारार्थ महापालिकेच्या छत्रपती शिवाजी महाराज रुग्णालयात दाखल करण्यात आले आहे. परंतु तिच्या उपचारार्थ लागणारे चिकनगुनियावरील आयव्हीएलजी 5 एमजीचे इंजेक्शन अद्यापही मिळाले नसल्याची माहिती शिवसेना नगरसेवक विकास रेपाळे यांनी दिली. या महिलेला ते इंजेक्शन का दिले जात नाही, याचा जाब त्यांनी विचारला. त्यावर मुख्य वैद्यकीय आरोग्य अधिकारी डॉ. वैयजंती देवगीकर यांनी ज्या फार्मासीकडून हे इंजेक्शन घ्यायचे आहे, त्याचे आधीचे बील न दिल्याने त्याने इंजेक्शनचा पुरवठा केला नसल्याचे सांगितले.
त्यानंतर या संदर्भात छत्रपती शिवाजी महाराज रुग्णालयाचे अधिष्ठाता डॉ. भीमराव जाधव यांच्याकडून महापौर नरेश म्हस्के यांनी या विषयीची माहिती घेतली असता, त्यांनी देखील बिल अदा न केल्यानेच इंजेक्शन दिले गेले नसल्याचे त्यांनी सांगितले. संबधींताचे बील मिळावे यासाठी कॅफोंना सांगण्यात आले असून त्यांनी बील न काढल्याची माहिती जाधव यांनी दिली.
दरम्यान महापौर नरेश म्हस्के यांनी संबधींत फार्मासीचे पैसे तत्काळ अदा करुन इंजेक्शन उपलब्ध करुन देण्याचे आदेश प्रशासनाला दिले. त्यानुसार गुरुवारी इंजेक्शन उपलब्ध करुन दिले जाईल असे आरोग्य विभागाच्या वतीने स्पष्ट करण्यात आले.
शहरात ऑगस्ट महिन्यात मलेरीयाचे ३६, डेंग्यु सदृष्य १३, चिकनगुनिया दोन आणि लेप्टोचे दोन रुग्ण आढळले असल्याची माहिती आरोग्य प्रशासनाकडून देण्यात आली आहे.
The post चिकनगुनियाच्या इंजेक्शनसाठी रुग्णांची फरफट appeared first on ठाणे वैभव.
This News post has not edited by GNP Team except the title. It has been retrieved from feed so all Copyrights belongs to RSS feed source.
If you still have issue let us know.
