अभियंत्यांवरील कारवाईत घोळ
ठाणे : चोर सोडून संन्याशाला फाशी असाच काहीसा प्रकार अभियंत्यांना निलंबित करण्याच्या प्रकरणात झाला असून ठाणे महापालिकेचा अजब गजब कारभार चव्हाट्यावर आला आहे.
शहरातील रस्त्यावरील खड्डे बुजविताना कामात हलगर्जीपणा केला म्हणून चार अभियंत्यांना निलंबित करण्यात आले होते. त्यामध्ये संदीप गायकवाड या कनिष्ठ अभियंत्यांचा देखील समावेश होता. हे अभियंते वागळे प्रभाग समिती क्षेत्रात कार्यरत आहेत. त्यांच्याकडे रस्ते दुरुस्ती किंवा रस्ते बांधणीची कामे नाहीत तरी देखील त्यांना शनिवारी निलंबित करण्यात आले होते. त्याबाबत वागळे प्रभाग समितीमधील अधिकारी कर्मचारी यांनी आश्चर्य व्यक्त केले आहे, पण खरी माहिती आज बाहेर आली आहे.
पालकमंत्री एकनाथ शिंदे यांच्या निवासस्थानाजवळील रस्त्यावरील खड्डे भर पावसात बुजवले जात होते. दुसऱ्या दिवशी ते उखडले होते. त्या बाबत वर्तमानपत्रात वृत्त प्रसिद्ध झाले होते. त्याची दखल घेऊन महापालिका आयुक्त डॉ. विपीन शर्मा यांनी तेथिल कामावर देखरेख ठेवणाऱ्या अधिकाऱ्यांच्या विरोधात कारवाई करण्याचे आदेश दिले होते. तेथिल काम लोकमान्य-सावरकरनगर प्रभाग समितीमधील गायकवाड या उप अभियंत्याच्या देखरेखीखाली सुरू होते, परंतु आडनावात साधर्म्य असल्याने संदीप गायकवाड यांना निलंबित करण्यात आले होते. ही झालेली चूक वरीष्ठ अधिकारी यांच्या लक्षात देखील आली आहे, परंतु महापालिका आयुक्त डॉ. शर्मा हे कारवाई करतील या भीतीने त्यांना कोणीही खरी वस्तुस्थिती सांगण्यास धजावत नाहीत, असे नगरसेवक एकनाथ भोईर यांनी सांगितले.
हे निलंबन करताना अस्थापना विभागाने आम्हाला फक्त प्रभागातील अभियंत्यांची नावे मागितली होती. त्यानुसार नावे देण्यात आली होती. वास्तविक तेथे जयंत गायकवाड यांचे नाव असायला हवे होते. उद्या तशी दुरुस्ती करून आयुक्तांना खरी वस्तुस्थिती आयुक्तांच्या निदर्शनास आणून दिली जाईल, असे नगर अभियंता अर्जुन अहिरे यांनी ‘ठाणेवैभव’ ला सांगितले.
येथे क्लिक करून आमच्या टेलिग्राम चॅनेलमध्ये सामील व्हा.
येथे क्लिक करून आमचे न्यूज अॅप डाउनलोड करा.
This News post has not edited by GNP Team except the title. It has been retrieved from feed so all Copyrights belongs to RSS feed source.
If you still have issue let us know.
