ठाणे : शहरातील खड्ड्यांना जबाबदार धरत चार कार्यकारी अभियंत्यांचा बळीचा बकरा करण्यात आला. मात्र, ठेकेदाराला ब्लॅक लिस्ट न करता मेहेरनजर का करण्यात आली, असा सवाल भाजपाचे गटनेते मनोहर डुंबरे यांनी केला आहे.
महापालिकेने प्रभाग समिती स्तरावरील खड्ड्यांना जबाबदार धरून कार्यकारी अभियंत्यांवर निलंबनाची कारवाई केली. मात्र, या कारवाईत दर्जाहीन कामे करणाऱ्या ठेकेदारावर कारवाई करायला हवी होती. या प्रकरणी ठेकेदारावर मेहेरनजर का करण्यात आली. नगर अभियंता व ठेकेदाराला कारवाईतून कसे वगळले गेले, असा सवाल श्री. डुंबरे यांनी केला.
ठाणे महापालिकेने पावसाळ्याच्या काळात शहरातील खड्डे भरण्यासाठी केवळ सव्वा दोन कोटींची तुटपुंजी तरतूद केली. मात्र, खड्डे कधी भरले गेले, याचा नागरिकांनाच नव्हे तर नगरसेवकांनाही पत्ता लागला नाही. खड्ड्याच्या पैशांवरही महापालिकेतील सत्ताधारी व प्रशासनाने डल्ला मारला, अशी टीका मनोहर डुंबरे यांनी केली.
भलत्याच अभियंत्याला निलंबनाची शिक्षा
महापालिकेने निलंबित केलेल्या चार अभियंत्यांच्या यादीत रस्त्याशी काहीही संबंध नसलेल्या एका अभियंत्यांचा समावेश आहे. घाईघाईत कारवाई करताना महापालिकेने भलत्याच अभियंत्यावर कारवाई केली. त्यामुळे या प्रकरणी प्रशासनाचे गांभीर्य उघड झाले, अशी टीका मनोहर डुंबरे यांनी केली.
येथे क्लिक करून आमच्या टेलिग्राम चॅनेलमध्ये सामील व्हा.
येथे क्लिक करून आमचे न्यूज अॅप डाउनलोड करा.
This News post has not edited by GNP Team except the title. It has been retrieved from feed so all Copyrights belongs to RSS feed source.
If you still have issue let us know.
