ठाणे, मुंबई, भिवंडी, उल्हासनगर, मीरा-भाईंदरसह १८ महापालिकांना आयोगाच्या सूचना
ठाणे : ठाणे महापालिकेसह राज्यातील १८ महानगरपालिकेच्या निवडणुका एक सदस्य वॉर्ड पद्धतीने करण्याचा निर्णय राज्य निवडणूक आयोगाने घेतला आहे. या वार्डाची पुनर्रचना २७ ऑगस्टपासून करण्याचे आदेश महापालिकांना देण्यात आले आहेत. ओबीसी आरक्षणाचा निर्णय होत नाही तोपर्यंत निवडणुका जाहीर करण्यात येणार नाहीत.
महापालिकेची मागील निवडणूक बहू सदस्य पद्धतीने झाली होती. यावेळी देखील तशाच पद्धतीने निवडणूक घेण्यात येईल, अशी शक्यता होती. परंतु राज्य निवडणूक आयोगाचे उपायुक्त अविनाश सणस यांनी आज एक आदेश काढून डिसेंबर २२ पर्यंत मुदत असलेल्या निवडणुकीकरिता प्रभाग रचनेचा कच्चा मसुदा तयार करण्याचे आदेश दिले आहेत. या कामाची सुरुवात २७ ऑगस्टपासून करावी अशी सूचना देखील करण्यात आली आहे, त्यामुळे ठाणे महापालिका नवीन प्रभाग रचना करण्याच्या कामाला सुरुवात करणार आहे. ही प्रभाग रचना सन २०११च्या जनगणनेनुसार केली जाणार आहे. त्यावेळी महापालिकेची १८ लाख लोकसंख्या होती, त्यामुळे महापालिकेच्या प्रभागाची संख्या वाढण्याची देखील शक्यता आहे. या वेळी अनुसूचित जाती आणि जमातीच्या आरक्षित प्रभाग संख्येत वाढ होण्याची शक्यता आहे.
महापालिका आयुक्त डॉ. विपीन शर्मा यांच्या अध्यक्षतेखाली नगर संचालक, निवडणूक कामाचा अनुभव असलेला अधिकारी प्रभाग रचना करण्यासाठी नेमलेले अधिकारी, संगणक तज्ञ यांची समिती तयार करून प्रभाग रचना तयार करण्यात यावी. ही रचना करताना भौगोलिकदृष्ट्या सीमा रेषा ठरविण्यात याव्यात त्यामध्ये नाले, मोठे रस्ते, गल्ली, डोंगर आणि फ्लायओव्हर गृहीत धरून रचना करावी. एका वस्तीचे विभाजन करू नये. अनुसूचित जाती अनुसूचित जमाती यांच्या वस्त्यांचे शक्यतो विभाजन करू नये. नागरिकांचे प्रभागातील दळणवळण शक्यतो विचारात घ्यावे, अशा सूचना करण्यात आल्या आहेत. मुंबई, ठाणे, उल्हासनगर, भिवंडी, पनवेल, मीरा-भाईंदर, पुणे, पिपरी-चिंचवड आदी १८ महापालिकांची मुदत २०२२ साली संपणार आहे. त्याची सहा महिने अगोदर निवडणूक आयोगाने तयारी सुरू केली आहे.
ओबीसी राजकीय आरक्षणाचा निर्णय प्रलंबित आहे. जोपर्यंत तो निर्णय घेतला जात नाही, तोपर्यंत निवडणुका जाहीर केल्या जाणार नसल्याचे एका अधिकाऱ्याने सांगितले. तर राज्य मंत्रिमंडळाच्या बैठकीत एक सदस्यपद्धतीचा निर्णय रद्द होऊन बहू सदस्य पद्धतीने निवडणुका होतील, असा अंदाज महापौर नरेश म्हस्के यांनी व्यक्त केला आहे.
This News post has not edited by GNP Team except the title. It has been retrieved from feed so all Copyrights belongs to RSS feed source.
If you still have issue let us know.
