ठाणे: ठाणे महापालिका प्रशासन आगामी महापालिका निवडणुकीच्या कामाला लागले असून आयुक्त डॉ. विपीन शर्मा यांनी वरीष्ठ अधिकाऱ्यांची नुकतीच बैठक घेऊन एक सदस्य पद्धतीने कशा प्रकारे रचना करायची याचे मार्गदर्शन केले आहे. तर इच्छुक उमेदवारांची उत्सुकताही शिगेला पोहोचली आहे.
राज्य निवडणूक आयोगाने २५ ऑगस्ट रोजी १८ महापालिकांच्या निवडणुकीकरीता एक सदस्य पद्धतीने प्रभाग रचना करण्याचा कच्चा आराखडा तयार करण्याचे आदेश महापालिका प्रशासनाला दिले होते. २७ तारखेपासून प्रभाग रचना करण्याच्या कामाला सुरुवात करण्यात यावी, असे देखील स्पष्ट करण्यात आले होते. त्यानुसार महापालिका आयुक्त डॉ. विपीन शर्मा यांच्या अध्यक्षतेखाली महापालिका नगर संचालक, दोन्ही अतिरिक्त आयुक्त, संगणक तज्ञ, निवडणुकीच्या कामाचा अनुभव असलेले उपायुक्त, सर्वेक्षण करणारे अधिकारी यांची बैठक पार पडली. त्यामध्ये २०११च्या जनगणनेनुसार एक सदस्य प्रभाग रचना करावी, नाले, मोठे रस्ते, फ्लायओव्हर, गल्ली यांचा समावेश करण्यात यावा, शक्यतो इमारती आणि वस्त्यांचे विभाजन होणार नाही याची काळजी घ्यावी, त्याचबरोबर मोकळ्या जागा, मैदान यांचा कोणत्या न कोणत्या प्रभागात समावेश करण्यात यावा, अशी सूचना या बैठकीत करण्यात आली
अनुसूचित जाती आणि जमातीच्या नागरिकांची वस्ती असलेल्या ठिकाणांचे विभाजन करण्यात येऊ नये, प्रभाग रचना करताना प्रगणक गट फोडण्यात येऊ नयेत, प्रभाग रचना करताना प्रभाग क्रमांक देण्यात येणार आहे तसेच प्रभागाची नावे देखील द्यावीत, प्रभागाची सीमा निश्चित करताना उत्तर, पूर्व, पश्चिम आणि दक्षिण असा उल्लेख करण्यात या प्रभाग रचना करताना उत्तरेकडून करून दक्षिणेकडे शेवट करावा तसेच प्रभाग क्रमांक देखील द्यावेत अशा सूचना देण्यात आल्या आहेत.
प्रभाग रचना करताना गुगलचा उपयोग करावा, त्याचे नकाशे टाकावेत, अशा देखील सूचना बैठकीत करण्यात आल्या आहेत. प्रभाग रचनेची माहिती कोणालाही देऊ नये, असे देखील सांगण्यात आले आहे. त्यामुळे अवघ्या एका महिन्यात कच्चा आराखडा तयार करून तो निवडणूक आयोगाला पाठविण्यात येणार आहे.
या बाबत महापालिका आयुक्त डॉ. शर्मा यांच्याशी संपर्क साधला असता ते म्हणाले की निवडणूक आयोगाने ज्या सूचना दिल्या आहेत त्यानुसार आम्ही अंमलबजावणी सुरू केली आहे. आज अधिकाऱ्यांची समिती स्थापन केली आहे. त्यांचे काम सुरू झाले आहे,असे त्यांनी ‘ठाणेवैभव’ला सांगितले.
येथे क्लिक करून आमच्या टेलिग्राम चॅनेलमध्ये सामील व्हा.
येथे क्लिक करून आमचे न्यूज अॅप डाउनलोड करा.
This News post has not edited by GNP Team except the title. It has been retrieved from feed so all Copyrights belongs to RSS feed source.
If you still have issue let us know.
