सातबारा नावावर नसूनही ठामपाने ‘जितो’ला दिला भूखंड?

ठाणे : भूखंडाचा सातबारा नावावर नसताना ठाणे महापालिकेने शैक्षणिक उपक्रमासाठी जितो या संस्थेला उथळसर येथील भूखंड करार करून दिला. ज्या संस्थेकडून हा भूखंड पालिकेने कराराने घेतला तो करारही गहाळ झाला असल्याने पालिकेची मोठी अडचण झाली आहे.

उथळसर येथे ठाणे महापालिकेची सात नंबरची शाळा सुरु होती. ही इमारत धोकादायक झाल्याने ती पाडण्यात आली. पालिकेच्या माध्यमातून जितो या संस्थेबरोबर करार करुन शैक्षणिक उपक्रमासाठी ही जागा देऊ केली आहे. ज्या संस्थेची ही जागा होती, त्या संस्थेने पुन्हा जागेवर दावा करुन ती जागा देखील इतर विकासकाला विकून टाकली आहे. विशेष म्हणजे या संस्थेकडे सातबारा आणि प्रॉपट्री कार्ड असल्याचा मुद्दा बुधवारच्या महासभेत नगरसेवकांनी उपस्थित केला आहे. त्यामुळे जागा ताब्यात नसतांनाही इतर संस्थेशी करार कसा केला असा सवाल भाजपच्या नगरसेवकांनी उपस्थित केला. यात महापालिकेची चुक असल्याचेही आता उघड झाले आहे.

४२ वर्षानंतरही पालिकेला ही जागा आपल्या नावावर करता आलेली नाही. केवळ नगरपरिषद असतांना हब्बीबुला ट्रस्ट बरोबर करारनामा करुन ही जागा पालिकेने घेतली होती. त्या संदर्भात एक करार करण्यात आला होता. ९० टक्के रक्कमही अदा करण्यात आली होती अशी माहिती आयुक्त डॉ. विपीन शर्मा यांनी महासभेत दिली. परंतु आता कराराची प्रत सापडत नसल्याचे त्यांनी सांगितले. तसेच महापालिकेच्या निदर्शनास ही बाब जुलै महिन्यात आली आहे. परंतु आता हा भुंखड पुन्हा ताब्यात घेण्यासाठी वेळ पडल्यास सर्वोच्च न्यायालयात जाण्याची तयारी देखील असल्याचे त्यांनी यावेळी स्पष्ट केले.

महापालिकेला डावलून शाळेच्या जागेचा सातबारा नावावर करण्यात आल्याप्रकरणी लाचलुचपत प्रतिबंधक विभागामार्फत चौकशी करण्याची मागणी नगरसेवक नजीब मुल्ला यांनी केली. त्यापाठोपाठ इतर नगरसेवकांनीही ही मागणी उचलून धरली. या प्रकरणाची चौकशी करण्यासाठी ठराव करण्याची सुचना महापौर नरेश म्हस्के यांनी दिल्यानंतर नगरसेवकांनी तशा प्रकारचा ठराव केला आहे.