वैद्यकीय मदतीच्या नावाने दोन नगरसेवकांना गंडवले

ठाणे : एमआरआय चाचणीसाठी ठाणे महापालिकेच्या छत्रपती शिवाजी महाराज रुग्णालयात पैसे कमी पडत असून मदत हवी, असे सांगून ठामपाच्या दोन नगरसेवकांना गंडा घातल्याची बाब महासभेत उघडकीस आली आहे.

ठाणे महापालिकेच्या छत्रपती शिवाजी महाराज रुग्णालयातील एमआरआय सेंटरमध्ये आपल्या तीन वर्षाच्या मुलीच्या एमआरआयसाठी पैसे कमी पडत असल्याचा फोन आल्याची माहिती त्यांनी सभागृहात दिली. ज्या व्यक्तीने फोन केला त्या व्यक्तीकडे केवळ अडीच हजार होते मात्र एमआरआयसाठी सहा हजार लागतील असे सबंधित व्यक्तीला सांगण्यात आले. त्यानंतर आपण स्वतः रुग्णालयाच्या डीनशी बोलून पैसे कमी करण्यासाठी सांगण्यात सांगितले. डीन यांना सांगूनही डीनच्या केबिनमध्ये देखील त्यांना घेण्यात आले नसल्याचा आरोप एकनाथ भोईर यांनी यावेळी केला. अशा प्रकारचा फोन आपल्याला देखील आला असून आपली फसवणूक झाली असल्याची माहिती शिवसेनेचे नगरसेवक गुरुमुख सिंग स्यांन यांनी सभागृहात दिल्यानंतर अवघे सभागृहच अवाक झाले. शिवसेनेच नगरसेवक सुधीर कोकाटे यांनाही अशाच प्रकारे फोन आला असल्याचे त्यांनी सभागृहात सांगितले . त्यानंतर भाजपचे गटनेते मनोहर डुंबरे यांनी देखील अशा प्रकारची टोळीच सक्रीय असल्याचे सभागृहात सांगितले.

प्राथमिक स्वरुपात पालिकेच्या या दोन नगरसेवकांची फसवणूक झाली असली तरी इतरही नगरसेवकांची फसवणूक झाली असल्याची शक्यता असल्याने या संपूर्ण प्रकरणाची गंभीर दखल घेऊन गुन्हे दाखल करण्याचा निर्णय सर्वसाधारण सभेत घेण्यात आला. ज्या व्यक्तीने पैसे मागण्यासाठी भोईर यांना फोन केला होता त्या व्यक्तीने कळवा हॉस्पिटलमध्ये एमआरआय करणाऱ्या डॉक्टरचे नाव डॉ.एकनाथ शिंदे असून त्यांनी ते एक हजार कमी करत असल्याचे सबंधित व्यक्तीने भोईर यांना सांगितले. विशेष म्हणजे नगरसेवक गुरुमुखसिंग स्यांन यांनी या सर्व प्रकारचा शोध लावल्यानंतर फसवणारी व्यक्ती नाशिकची असल्याचे उघड झाले आहे.